A Brigada Municipal de Obras do Concello de Noia vén de rematar unha nova actuación na Barquiña, onde instalou máis de 100 metros de canalizacións para resolver unha deficiencia que afectaba desde hai anos aos veciños e veciñas da zona.
Os traballos foron executados directamente con medios municipais, o que, en palabras do Concello, “permitiu dar unha resposta eficaz a esta demanda e supuxo un aforro estimado de arredor de 15.000 euros respecto da súa contratación externa”.
A mellora das infraestruturas de saneamento continúa sendo unha prioridade para o Concello de Noia. Deste xeito, explicaron fontes do Consistorio, proseguirán as actuacións nos puntos que presentan deficiencias, ampliando e renovando a rede municipal e traballando na prevención e eliminación de vertidos.
