As Escolas Deportivas Municipais de Dodro correspondentes ao curso 2026-2027 abren esta semana o seu prazo de inscrición, concretamente o mércores 9. Trátase dun programa de actividades que ofrece unha alternativa de ocio para a poboación, buscando xeitos de mellorar a calidade de vida e o lecer da veciñanza. A axenda divídese en 3 bloques en función da idade: menores de 15 anos, persoas adultas e maiores de 65 anos ou persoas con mobilidade reducida.
Este ano introdúcense algunhas variacións con respecto ó curso anterior buscando unha renovación: actividades novidosas (en palabras do Concello) que “complementen a oferta deportiva e que buscan chegar a un público máis amplo”.
Para os menores de 15 anos o Concello ofrece as seguintes escolas: Psicomotricidade, Patinaxe, Multibaile e Artes Marciais Júnior. Para os adultos Ximnasia de Mantemento, Coreodance, Pilates e Full Body. E para os maiores de 65 anos e/ou mobilidade reducida Psicomotricidade e Tonificación.
A inscrición comeza o vindeiro 9 de setembro. As persoa interesadas en formalizar a inscrición poden facelo no Departamento de Deportes, no Pavillón Polideportivo Municipal.
A taxa correspondente a cada actividade farase efectiva unha vez confirmada a praza.
No caso de que as solicitudes superen o número máximo de prazas realizarase un sorteo. Para máis información chamar o 981 802 532 ou ao 689 897 223 , por correo electrónico na dirección deportes@dodro.gal.
