O Concello de Boiro abre o prazo de inscrición do curso 2026/2027 de educación para persoas adultas. O prazo de presentación de solicitudes é do 3 ao 22 de setembro e deberá facerse mediante o Rexistro Xeral do Concello de Boiro.
Trátase dunhas ensinanzas destinadas a persoas maiores de 18 anos que non posúan o título da ESO e ofrecen a posibilidade de adquirir, actualizar ou complementar os coñecementos e aptitudes do alumnado para o seu desenvolvemento persoal e profesional. Esta formación ten “como obxectivos adquirir e actualizar a formación básica, mellorar a cualificación profesional, adquirir novos conceptos, técnicas e habilidades para unha adaptación ao mundo laboral actual”, informou o Concello.
A aula de educación para persoas adultas do Concello de Boiro está adscrita ao IES San Clemente de Santiago de Compostela, desprazándose o profesorado do centro a Boiro para as avaliacións. A formación é cuadrimestral e o horario das clases será de luns a xoves de 20.00 a 22.00 horas no Centro Social de Boiro para que poidan ser compatibles coa xornada laboral.
Ofértanse un total de 50 prazas nos catro módulos: 1º, 2º, 3º e 4º, podéndose realizar dous módulos en cada curso escolar. Cada un dos módulos consta de ámbito científico-tecnolóxico (matemáticas, bioloxía, física); ámbito lingüístico (galego, castelán, inglés ou francés) e o ámbito social.
As persoas interesadas poden inscribirse entre o 3 e o 22 de setembro presentando a solicitude xunto co DNI e o certificado de estudos realizados no Rexistro Xeral do Concello de Boiro. Toda a información está dispoñíbel na web municipal, de xeito presencial no Centro Social de Boiro ou o teléfono 981 84 84 25.
