O cemiterio coruñés de San Amaro acolleu este sábado un acto civil de homenaxe a Alejandro Pérez Lugín con motivo do primeiro centenario do seu pasamento, ocorrido o 5 de setembro de 1926 no Burgo (Culleredo). A iniciativa partiu do Museo Casa de la Troya de Santiago e da Asociación de Antiguos Compostelanos, coa colaboración da Tuna de Veteranos da Coruña e da Asociación da Prensa da Coruña (APC).
A conmemoración consistiu nunha ofrenda floral ante o sartego do autor de La casa de la Troya, presidido pola escultura xacente obra de Bonome e situado a carón doutros dous senlleiros personaxes retratados na súa obra: o exalcalde e expresidente da RAG Manuel Casás e o xornalista Alejandro Barreiro. Durante o acto tomaron a palabra Benigno Amor, presidente da Asociación de Antiguos Compostelanos; Domingo Álvarez, presidente da Tuna de Veteranos da Coruña; e Doda Vázquez, presidenta da APC. O tributo pechouse coa interpretación musical conxunta de varias pezas a cargo da Tuna de Veteranos e da agrupación Troyanos de Compostela.
Benigno Amor reivindicou a pegada do escritor, xornalista e cineasta madrileño de orixe galega:
«A Pérez Lugín debémoslle a novela máis popular de todas cantas se cinguen ao ambiente compostelán: La casa de la Troya (1915). Éxito de vendas inmediato, fascinou aos lectores do seu tempo e non tardou en ser adaptada ao cine, ademais de recibir o premio Fastenrath da RAE».
A figura de Lugín mantivo sempre unha fonda unión con Galicia, terra coa que tiña lazos familiares directos —súa nai era prima de Rosalía de Castro— e onde cursou Dereito. Esta relación estreita traduciuse no afecto da cidade da Coruña, cuxo concello asumiu o seu enterro hai un século e dedicoulle unha rúa en Cidade Xardín, ademais do premio de xornalismo fundado tras o seu legado á prensa coruñesa. Os organizadores avanzaron que nos vindeiros meses proseguirán os actos conmemorativos deste centenario.
