O BNG achegou a súa postura sobre a calidade do servizo de transporte despregado pola empresa Monbus no Barbanza. En palabras da agrupación, trátase dun servizo que amosa sinais dun “grave deterioro”, polo que reclaman á Xunta que “deixe de mirar para outro lado ante os incumprimentos de Monbus”. De feito, a deputada Rosana Pérez vén de rexistrar no Parlamento galego unha proposición non de lei na que reclama “axilizar a nova concesión do transporte da comarca” e “extremar o control sobre a empresa no caso de que finalmente resulte adxudicataria, tendo en conta os seus antecedentes”.
A deputada da Pobra do Caramiña. comentou que “a nova concesión, anunciada pola Xunta durante máis de dous anos, ten un valor de preto de 13,6 millóns de euros ata 2030 e só recibiu a oferta de Monbus, a mesma empresa que acumula anos de queixas da cidadanía e que mesmo foi condenada polo Tribunal Superior de Xustiza de Galiza a pagar unha penalización á Xunta por incumprir o contrato”. E engadiu: “Non pode ser que a resposta da Xunta ante anos de incumprimentos sexa volver confiar na mesma empresa sen garantir que o servizo vaia mellorar”.
Para Pérez, esta situación ten xa unha tradución directa no transporte escolar de Ribeira.
Segundo denunciou o ex-alcalde de Ribeira e portavoz Luís Pérez Barral, no inicio do curso estanse producindo “graves incidencias”. No caso do IES No1, dixo, “temos microbuses que se enchen e deixan alumnado atrás, rutas que continúan sen cubrir unha semana despois do inicio das clases e constantes problemas de puntualidade”. As ANPAs, sinalou, “tamén alertaron destes problemas, e de feito en Palmeira denunciaron inicialmente as rutas fantasma con autobuses que non realizaban os percorridos previstos, e mentres no CEIP de Olveira as familias denunciaron condutores que descoñecían as rutas e problemas coas paradas e os listados do alumnado”. A isto, engadiu, “súmanse as denuncias da CIG sobre a situación do persoal”. Seguindo este fío dixo que “o sindicato sinala que traballadores de Monbus procedentes da anterior concesionaria non foron chamados ou incorporados correctamente e denuncia incumprimentos das rutas previstas na licitación, así como problemas de organización do servizo”.
Rosana Pérez reclamou no Parlamento que a Xunta “non se limite a adxudicar contratos, senón que controle o seu cumprimento e garanta que as condicións previstas se prestan efectivamente”.
Mediante esta iniciativa o BNG volve a reclamar unha proposta esencial de mobilidade na nosa comarca: a conexión coa liña ferroviaria do país. Porén, o grupo nacionalista propón que se inclúa unha partida nos Orzamentos de 2027 para ampliar o transporte público do Barbanza cunha conexión coa estación de ferrocarril de Catoira, con cando menos dous servizos Catoira-Ribeira os venres pola tarde e dous Ribeira-Catoira os domingos pola tarde.
“A Xunta non pode mirar para outro lado mentres as familias denuncian que os autobuses non pasan, chegan tarde ou non teñen capacidade suficiente e mentres o persoal denuncia problemas na organización do servizo”, sinala o BNG.
O BNG reclama así á Xunta “que actúe de inmediato, esixa a Monbus o cumprimento das rutas e das condicións da contratación e garanta un transporte escolar seguro, puntual e suficiente”.
