As novas residencias situaranse na zona Noia/Barbanza, o centro principal estaría no Porto do Son e o de menor tamaño en Outes. , a iniciativa inclúe, xunto con estas 24 novas residencias, a comprometida pola Xunta de Galicia en Ribeira, con máis de 100 prazas, e na que xa se está traballando co Concello na cesión da parcela na contorna do parque de San Roque.
As comarcas do Barbanza, Muros-Noia e O Salnés contarán con varios dos novos centros asistencias incluídos no plan de residencias aprobado polo Consello da Xunta, unha estratexia dotada con 1.800 novas prazas en vinte e cinco centros en Galicia, onde polo menos o 60 % serán de titularidade pública autonómica.
No ámbito do Barbanza e Muros-Noia, o proxecto ratifica a construción da residencia comprometida de máis de cen prazas en Ribeira, cuxos trámites avanzan para a cesión da parcela municipal na contorna do parque de San Roque. A maiores, dentro do lote asignado a esta contorna, Porto do Son acollerá a infraestrutura principal de máis de cen prazas, que traballará en rede cun centro satélite de menor tamaño situado no municipio veciño de Outes.
Pola súa banda, na comarca do Salnés a distribución establecida pola Administración autonómica contempla a creación doutro lote conxunto. Sanxenxo foi o emprazamento escollido para albergar a residencia de gran capacidade con máis de cen prazas, mentres que o centro satélite complementario levantarase en Cambados.
Os concellos implicados terán un mes de prazo para formalizar a súa adhesión a esta iniciativa autonómica e disporán dun ano para poñer á disposición da Xunta as parcelas dotacionais que cumpran coas condicións técnicas para iniciar as obras.
