O alcalde, José Ramón Romero, o concelleiro de Urbanismo e Obras, Luis Ruiz, e a concelleira de Ensino, Carmen Silva, visitaron na mañá deste mércores 9 as instalacións do CEIP Santa María do Castro para coñecer como se desenvolveu o inicio do curso escolar 2026/2027.
Durante a visita puideron comprobar tamén como evolucionan as obras de instalación dunha pérgola no patio que conecta o edificio de infantil co de primaria. “Estamos a comprobar como avanzaron as obras nos distintos centros para o inicio do curso escolar e seguimos traballando para acondicionar e mellorar os nosos centros de ensino”, afirmou o alcalde.
Durante o verán o Concello de Boiro realizou obras de conservación e mantemento nos distintos centros educativos do municipio como son o pintado de aulas, pavillóns e outras estancias; substitución de areeiros; acondicionamento das zonas axardinadas dos patios; revisión da sinalización viaria nas contornas dos centros; ou o reforzo da limpeza durante a época estival.
