O conselleiro de Sanidade, Antonio Gómez Caamaño, visitou a semana pasada a localidade de Noia, onde foi recibido polo alcalde, Fran Pérez, e membros do Goberno municipal. A visita produciuse poucos días despois de que a Consellería de Sanidade solicitase formalmente ao Concello a licenza de construción do novo centro de saúde, co obxectivo de axilizar os prazos administrativos para aprobar o proxecto de execución definitiva e poder sacar a contratación as obras canto antes. Trátase, en palabras do Goberno local “dun novo e importante paso para avanzar cara á execución desta infraestrutura”.
O futuro centro contará con preto de 4.200 metros cadrados, máis do dobre da superficie do actual, e suporá un investimento previsto superior aos 10 millóns de euros. Ademais, incorporará un espazo propio de 170 m² para a Unidade de Condutas Aditivas de Noia (integrarase no novo Plan de Saúde Mental e estará situado no andar baixo do edificio, destinándose especificamente a esta unidade, que dará cobertura tanto a Noia como aos concellos de Lousame, Porto do Son, Outes, Muros e Carnota).
Ademais, prevese ampliar a área asistencial clínica ata as 21 consultas (medicina, enfermaría, farmacia, odontoloxía e hixienista), ademais de contar cunha zona de pediatría máis grande con sala de observación, unha nova área de fisioterapia con vestiarios e a ampliación do Punto de Atención Continuada (PAC) coa integración da base da ambulancia do 061.
Desde o Concello comprometéronse en “axilizar a tramitación da licenza e facilitar que o proxecto poida continuar avanzando cara ao inicio das obras”.
