A alcaldesa de Muros, María Lago, enviou esta mañá á conselleira de Política Social da Xunta, Fabiola García, unha carta para esixirlle “a urxente cobertura de postos na Escola de Educación Infantil de Muros”.
En palabras da rexedora, “a falta de persoal nesta escola, da rede Galiña Azul da Xunta, está a afectar ao normal funcionamento do centro e á conciliación das familias usuarias. O curso iniciouse o 8 de setembro, cun atraso dunha semana, e actualmente só están incorporadas dúas das seis traballadoras necesarias”. Engade que “esta situación está a impedir a prestación do servizo no horario completo, ofrecéndose actualmente ás familias atención só ata as 13:30 horas, debido ao incumprimento das ratios de persoal”.
Así mesmo, a carta lembra que estaba prevista para hoxe, luns 14 de setembro, a incorporación da totalidade do alumnado matriculado, “sen que, segundo se trasladou ao Concello, estea garantido o cumprimento das ratios necesarias, o que podería impedir a asistencia das crianzas ao centro”.
“Esta situación está a ocasionar graves dificultades de conciliación familiar e laboral ás familias usuarias, polo que lle solicito que se adopten con carácter urxente as medidas necesarias para cubrir os postos vacantes, garantindo o cumprimento das ratios e a prestación do servizo no seu horario habitual”, remata a alcaldesa, que demanda á Xunta “que informe a este Concello sobre as actuacións previstas e a previsión para a incorporación do persoal”.
