A Xunta declara de interese autonómico a reordenación da contorna do CHUS para crear novos accesos, espazos peonís e 1.500 prazas de aparcadoiro
O Consello da Xunta deu luz verde este luns á declaración de interese autonómico para o proxecto de ordenación da contorna do Complexo Hospitalario Universitario de Santiago (CHUS). A medida permitirá axilizar a obtención dos terreos necesarios para unha transformación integral que busca resolver os actuais problemas de mobilidade e preparar o espazo para o crecemento futuro das instalacións sanitarias compostelás.
A empresa Proyfe traballa na redacción deste plan de ordenación, cuxa finalización está prevista entre finais deste ano e comezos de 2027. O documento definirá con precisión as parcelas afectadas e a distribución final dos espazos, co obxectivo prioritario de afastar o tráfico rodado do centro do recinto sanitario e reforzar a seguridade dos desprazamentos a pé entre o Hospital Clínico, o Gil Casares e o novo Centro de Protonterapia.
Un dos piares centrais do proxecto é o aparcadoiro. O Goberno galego proxecta a construción dun edificio de varias plantas no perímetro do complexo con arredor de 1.500 prazas, destinadas a concentrar os vehículos fóra das inmediacións dos centros asistenciais. De maneira paralela, prevese a posta en marcha duns 500 postos de estacionamento provisionais para aliviar a demanda actual mentres non se execute a infraestrutura definitiva.
A reordenación viaria contempla crear un circuíto perimetral para evitar que os automóbiles particulares teñan que cruzar o interior do hospital. Este esquema permitirá diferenciar con claridade os tráficos de persoal, pacientes, autobuses, taxis e ambulancias, complementado cun novo acceso desde a conexión do periférico con Mestre Mateo e melloras no enlace cara á Choupana. Así mesmo, a intervención reservará solo para futuras ampliacións do complexo —con especial atención á demanda de espazo en Urxencias—, sumándose á recta final das obras do Edificio C e á posta en marcha do Centro de Protonterapia.
