Unha persoa tivo que ser evacuada de urxencia en helicóptero sanitario esta tarde tras ser sacada da auga en estado inconsciente na praia de Compostela, no concello de Vilagarcía de Arousa.
O Centro Integrado de Atención ás Emerxencias 112 Galicia tivo constancia do suceso dez minutos antes das seis da tarde grazas á chamada dun particular. A persoa alertante informou de que a vítima se atopaba aboiando no mar e que, tras conseguiren retirala ata a beira, varios bañistas e persoas presentes comezaran a realizar tarefas de reanimación sobre a area.
Dende a sala de operacións activouse un operativo no que se mobilizou a Urxencias Sanitarias de Galicia-061, patrullas da Policía Nacional e da Policía Local, canda membros do Servizo Municipal de Emerxencias de Vilagarcía. Tras recibir as primeiras asistencias no propio areal para tentar estabilizala, a persoa foi evacuada a bordo do helicóptero medicalizado con base en Santiago cara a un centro hospitalario.
