A Audiencia Provincial da Coruña ratificou a condena de 15 meses de prisión e o pago dunha indemnización de 40.800 euros para un mariscador furtivo que agrediu con violencia a un axente en decembro de 2020.
O home, sorprendido faenando de xeito ilegal na zona dos Raposiños, fuxiu ata a praia da Ribeiriña. Alí golpeou catro veces cun remo a un membro de Gardacostas de Galicia, causándolle unha fractura de cúbito que precisou cirurxía e 520 días de recuperación. Posteriormente, xunto á súa vivenda, baleirou un bidón de gasolina diante da Policía Local e ameazou con prenderlles lume antes de ser arrestado pola Garda Civil.
O tribunal desestimou o recurso da defensa —que pedía a eximente por drogadicción— e mantén as penas por cadanseus delitos de atentado e lesións.
