O equipo da Federación Galega liderado por Carlota Hernández manda na estrea da Liga Iberdrola en Vilagarcía
A tripulación RFGV-Ence sitúase á fronte tras asinar tres vitorias nunha xornada inaugural marcada pola igualdade e as condicións idóneas na ría
O outro barco autonómico, o RFGV-Wavefit de Sandra González, marcha terceiro por detrás do Pulperas do RCN Calpe
As tripulacións da Real Federación Galega de Vela (RFGV) fixeron valer este sábado o seu coñecemento do campo de regatas de Vilagarcía de Arousa e o dominio dos monotipos Elliott 6m. para situarse nos postos de privilexio da etapa galega da Liga Iberdrola de Vela Feminina. O barco liderado por Carlota Hernández (RFGV-Ence) rematou a primeira xornada como líder provisional da táboa tras rubricar tres triunfos parciais e un segundo posto.
O inicio da tempada 2026/27 estivo marcado pola igualdade entre a frota composta por 16 equipos procedentes de nove comunidades autónomas. Proba diso é que os sete primeiros clasificados lograron anotarse canto menos un triunfo parcial ao longo das 14 mangas disputadas durante o día. A segunda praza provisional é polo de agora para o Pulperas do RCN Calpe, patroneado por Sara Momplet, mentres que o podio provisional péchao o outro conxunto anfitrión, o RFGV-Wavefit de Sandra González, na terceira posición.
Cambio de condicións na ría
A ría de Arousa ofreceu unha xornada moi completa grazas á alternancia do vento. Pola mañá, a frota navegou con vento de compoñente norte de entre 15 e 20 nós de intensidade. Pola tarde, tras un pequeno parón, entrou a brisa térmica duns 7 nós, o que puxo a proba a adaptabilidade das regatistas a bordo dos seis monotipos Elliott 6m. que se foron repartindo as quendas de competición.
“Foi un día fantástico. Non pasa en todas as rías ter condicións tan diferentes pola mañá e pola tarde, así que é un privilexio ter gozado deste día en Vilagarcía”, sinalou Carlota Hernández, patroa do equipo que comanda a táboa. Pola súa banda, Ilda Martín, tripulante do RFGV-Wavefit, valorou positivamente o terceiro posto provisorio tendo en conta que era a primeira vez que navegaban xuntas nesta embarcación.
Axuste pola parte alta
Tralo podio provisional, o equipo do RCN Gran Canaria comandado por Inés Martín-Urda ocupa a cuarta posición tras asinar tres primeiros, un terceiro e un fóra de liña que lle impediu escalar máis postos. Pechando o grupo de cabeza situouse o Natulim do CN Sevilla, con Carlota Massana á cana e actuais líderes da tempada 2026, que tivo un debut máis discreto e marcha en quinta posición.
A competición, que supón o cuarto e penúltimo evento do circuíto 2026 e á súa vez a proba inaugural do curso 2026/27, resolverase este domingo. Tras completar a rolda clasificatoria, os seis primeiros clasificados disputarán tres medal races directas para definir os postos de honra en augas arousás.
