As ANPAs dos centros de Aguiño, Palmeira, Frións, Artes, Carreira, Santa Uxía, Deán Grande, Olveira e Caramecheiro emitiron un comunicado conxunto no que critican que o curso comezase este mércores 9 de setembro “sen información suficiente sobre como vai funcionar o programa de conciliación e o servizo de madrugadores”. E engaden: “Levamos semanas solicitando datos e unha reunión conxunta co Concello, e non a obtivemos”.
No comunicado fan saber que “alén da falta de información, hai un problema de fondo: este curso a hora de monitorado que o Concello asigna a cada centro ten que destinarse exclusivamente ao servizo de madrugadores. O curso pasado cada centro podía decidir en función da súa demanda real, e reclamamos que se recupere esa flexibilidade”. As ANPAs lembran que a necesidade non é a mesma en todos os centros e que nuns a demanda concéntrase en madrugadores e noutros en comedor, e a composición das familias, os horarios e o tamaño de cada centro varían moito dun a outro. Para as asociacións de nais e pais, “un modelo único aplicado a nove realidades distintas deixa recursos públicos infrautilizados nuns centros mentres noutros queda sen cubrir o servizo que as familias si demandan”.
Lembran que esta cuestión foi trasladada ao consello escolar municipal do 11 de maio de 2026 e que daquela “o Concello respondeu que a estudaría e que informaría da súa decisión, mais non houbo ningunha comunicación desde entón”.
“Se se contase coas ANPAs, non estariamos hoxe pedindo isto por escrito. O modelo deste curso decidiuse sen preguntarnos, e por iso non encaixa co que cada centro necesita”, apuntan.
Por todos estes motivos, as entidades solicitan o seguinte:
-Información clara e inmediata sobre o funcionamento do programa e do servizo de madrugadores.
-Unha reunión conxunta coas ANPAs dos centros participantes.
-Flexibilidade para que cada centro destine a hora de monitorado a madrugadores ou a comedor, segundo a súa demanda, como o curso pasado.
-Que non se esixa alumnado mínimo, para que os centros máis pequenos non queden fóra.
-Unha canle de comunicación directa e estable entre o Concello e as ANPAs.
A dito engádese o malestar polas subvencións pendentes de aboar ás ANPAs, que, segundo indican, “dificultan a planificación das asociacións e que solicitamos resolver”.
