A Asociación Ambar das Persoas con Diversidade Funcional, entidade inclusiva do Barbanza, será a encargada de dar o pregón das Festas do Nazareno o 18 de setembro, ás 21.15 horas. A súa intervención marcará o inicio dunha das celebracións máis destacadas do calendario festivo da Pobra do Caramiñal.
Con máis de catro décadas de traxectoria, Ambar traballa desde 1982 na comarca do Barbanza para promover a autonomía, a independencia e a igualdade de oportunidades das persoas con diversidade funcional. O seu labor contribúe a eliminar barreiras e a favorecer a participación plena na comunidade.
A Comisión de Festas e o Concello da Pobra do Caramiñal destacan “o compromiso da entidade coa inclusión e poñen en valor a importante función social que desempeña na contorna”.
Tamén animan á veciñanza a acompañar a Ambar nesta cita e a compartir o inicio das Festas do Nazareno.
Quen queira coñecer máis sobre a entidade, os seus proxectos e o traballo que desenvolve pode visitar a súa páxina web: asociacionambar.org.
