O Concello de Boiro promove unha nova edición das Escolas Deportivas Municipais para a tempada 2026/2027 nas distintas modalidades. O concelleiro de Deportes, Marcos Fajardo, presentou o programa de actividades xunto co técnico do departamento, Manuel González.
Segundo lembraron, as Escolas Deportivas Municipais contan cunha traxectoria de 34 anos e ofertan tanto actividades en categorías infantís e xuvenís así como para persoas adultas nunha vintena de modalidades deportivas.
“As actividades desenvólvense en colaboración cos clubs locais e medran ano a ano, contando xa con mais dun milleiro de prazas nas distintas modalidades”, afirmou o Manuel González.
A oferta de actividades para persoas adultas engloba ximnasia para persoas xubiladas, Boiro Actívate para persoas con patoloxías ou doenzas específicas, mantemento físico, tenis e iniciación ao voleibol. En canto ao programa deportivo infantil e xuvenil engloba programas como o de mellora da motricidade ou promoción do voleibol; así como tenis, ciclismo, atletismo, voleibol, xadrez, remo, piragüismo, baloncesto, tríatlon, natación, golf, vela e patinaxe artístico.
Ademais das actividades programadas no marco das Escolas Deportivas cos distintos clubs deportivos do municipio, o Concello de Boiro ofrece ás persoas usuarias a posibilidade de solicitar o uso das distintas instalacións deportivas para a práctica deportiva de xeito libre.
As Escolas Deportivas Municipais 2026/2027 do Concello de Boiro desenvolveranse entre os meses de outubro e maio. As inscricións para participar están xa abertas e poden facerse de xeito presencial no departamento municipal de deportes, situado no edificio das Colonias de Praia Xardín, ou mediante o enderezo electrónico deportes@boiro.org ou os teléfonos 679 712 621 e 660 182 443.
O concelleiro de Deportes, Marcos Fajardo, reafirmou o compromiso do Concello de Boiro co deporte base xa que “para nós é un orgullo que os nenos e nenas poidan practicar durante todo o ano o deporte que máis lles gusta”.
Recordou que a Administración local inviste preto de 100.000 euros para o desenvolvemento das Escolas Deportivas Municipais, ademais das outras propostas como os veráns deportivos ou as distintas probas e competicións que se organizan ou coas que se colabora durante todo o ano.
