O director xeral de Comercio e Consumo avanza no Parlamento a meta de acadar 10 prazas certificadas antes de rematar o ano tras a recente incorporación de Tui.
A Rede de Mercados Excelentes de Galicia continúa a súa expansión e conta xa con sete prazas de abastos certificadas tras a recente adhesión de Tui. O director xeral de Comercio e Consumo, Gabriel Alén, destacou hoxe na Comisión 6ª do Parlamento galego que a previsión do Goberno autonómico pasa por acadar os 10 espazos distinguidos ao longo deste 2026 e chegar aos 25 ao remate de 2030, segundo fixa o Plan estratéxico do comercio de Galicia.
Alén subliñou o papel destes recintos como escaparates do produto fresco, local e de calidade, poñendo en valor medidas recentes coma a simplificación dos trámites para acadar o selo e a posta en marcha do Plan de impulso da Rede. A través deste mecanismo, a Xunta asina convenios cos concellos para financiar ata o 70 % das reformas necesarias, aos que se suma o protocolo asinado coa Deputación de Ourense para cubrir ata un 20 % adicional.
Durante este ano sumáronse á rede as prazas de Carballo, Ribeira, Ponteareas e Tui, que se uniron ás xa recoñecidas de Pontedeume, Tomiño e Vilagarcía de Arousa. Ademais, o Goberno galego tramitou convenios en concellos como Ames, Sanxenxo, Xinzo de Limia, Ribadavia e O Carballiño, cun investimento global de 12,3 millóns de euros. No caso ourensán, as obras en marcha permitirán certificar a curto prazo a metade dos seis mercados cos que conta a provincia.
A folla de ruta autonómica contempla novos proxectos e auditorías de diagnose nunha vintena de prazas en toda a comunidade:
- A Coruña: Ames, A Magdalena (Ferrol) e Cee.
- Pontevedra: Sanxenxo, Mondariz-Balneario, Ribadumia, O Grove, Redondela, Oia, Cangas, A Guarda, Salceda de Caselas e O Porriño.
- Ourense: Xinzo de Limia, Ribadavia e O Carballiño.
- Lugo: Viveiro e Ribadeo.
