O Concello da Pobra do Caramiñal dá a benvida ao curso 2026-2027 despois dun verán no que se intensificaron os labores de mantemento dos centros públicos de infantil e primaria do municipio. As principais melloras leváronse a cabo durante o mes de agosto e supuxeron un investimento superior aos 30.000 euros.
A concelleira de Educación, Amparo Cerecedo, deu conta destes traballos nunha rolda de prensa acompañada por Carlos Abuín, un dos tres conserxes municipais encargados do mantemento dos centros. Cerecedo lembrou que esta é unha competencia que o Concello atende durante todo o ano e que no período estival se reforza con intervencións extraordinarias.
Neste caso, no Colexio Fernández Varela reparáronse os desperfectos da fachada e na Escola do Campo da Angustia acondicionouse unha zona de horta con finalidade lúdica e educativa. As melloras na Escola da Granxa abrangueron tanto a fachada como o interior dunha das aulas, onde se realizaron tarefas de impermeabilización e pintura, ademais da colocación de canlóns en toda a edificación.
Xunto a estas intervencións, durante o ano lévanse a cabo outros labores ordinarios, entre eles a pintura de interiores, as rozas e a reparación de peches e fiestras.
A planificación municipal mira xa cara á seguinte mellora, que se realizará a comezos do vindeiro ano na fachada da Escola Unitaria do Vilariño.
Cerecedo aproveitou a presentación para agradecer especialmente o labor e a implicación coa comunidade educativa dos tres conserxes municipais e trasladou a benvida ao novo curso ao alumnado, ao profesorado e ás familias.
