A intervención na plataforma da capela maior obrigará a interromper o culto nesta zona a partir do 16 de outubro.
- O templo manterá o seu réxime habitual de visitas turísticas e conservará a eucaristía matinal das 7:30 horas na capela da Comuñón.
A Catedral de Santiago de Compostela trasladará temporalmente a celebración das tradicionais Misas do Peregrino á próxima igrexa de San Agostiño. A medida farase efectiva a partir do vindeiro venres 16 de outubro e manterase de xeito indefinido, ata novo aviso, con motivo dunha intervención e remodelación que se vai levar a cabo no ámbito da capela maior da basílica.
Os traballos previstos centraranse fundamentalmente na plataforma de madeira sobre a cal se asentan actualmente a mesa do altar maior, o ambón e a sede. A execución destas tarefas fai incompatible o mantemento do culto nese espazo central do templo xacobeo, o que motivou a reorganización dos servizos relixiosos para garantir a atención ás persoas que culminan o Camiño.
Deste xeito, as Misas do Peregrino acolleranse en San Agostiño nos seus horarios habituais: ás 9:30 h, ás 12:00 h e ás 19:30 h. Pola súa banda, a primeira eucaristía da xornada, a das 7:30 horas, continuará a celebrarse no interior da catedral, aínda que se desprazará á capela da Comuñón.
Malia ás obras no presbiterio, a actividade xeral do monumento non se verá interrompida. As visitas culturais e turísticas poderán seguir realizándose con total normalidade dentro do horario habitual de apertura do recinto catedralicio, ininterrompido de 7:00 a 21:00 horas.
