Neste mes marcado pola celebración do Día Mundial para a Prevención do Suicidio, o 10 de setembro, a entidade solidaria AGPAS (a Asociación Galega de Prevención e Apoio ante o Suicidio, impulsora de Stop Suicidio Galicia), ten importantes novidades en materia de actividades e proxectos.
Por exemplo a inauguración da súa sede en Noia, o día 18 deste mesmo mes, ao que se suma a presentación dunha guía de peto.
A estrea das dependencias, situadas na rúa Pontevedra, 3, en Noia, acompañaranse dun posto informativo, dunha visitas ás instalacións e ás actividades de divulgación e dunha xornada participativa e aberta coa veciñanza, as entidades sociais e representantes institucionais.
A sede dará apoio de proximidade á Barbanza e á contorna rural compostelá e contará con espazos acondicionados para a atención telefónica a persoas de toda Galicia. A nosa liña de escoita e apoio 24 horas cumprirá precisamente catro anos de actividade ese 18 de setembro.
Durante a xornada AGPAS presentará unha guía de peto de prevención do suicidio, escrita con palabras cotiás e situacións recoñecíbeis (como iniciar unha conversa cando alguén nos preocupa, como acompañar e onde buscar apoio, tamén cando somos nós quen o precisamos).
A guía reúne a experiencia de persoas que sobreviviron a tentativas e de persoas que perderon alguén por suicidio (parte esencial de AGPAS), xunto coas achegas de profesionais da entidade e a colaboración de entidades da Comunidade de Madrid, da Comunitat Valenciana, de Estremadura e doutros territorios.
A presentación servirá tamén para propoñer un piloto en Noia, Barbanza e área do rural de Santiago de Compostela dunha cara exterior amarela coa mensaxe Preciso axuda e que se poida amosar cando custa expresar a problemática que cada quen leva dentro. “Queremos estudar a súa aplicación con centros educativos, concellos e entidades, acompañándoa de persoas de referencia formadas e vías claras de apoio”, sinalan dende a asociación, que contará para esta actividades coa colaboración do Concello de Noia, que xa confirmou que iluminará de amarelo a fachada da Casa Consistorial na noite do día 18.
Dende AGPAS lanza un convite a outros concellos, asociacións e entidades para que “se sumen á iniciativa iluminando as súas sedes ou edificios emblemáticos como xesto compartido de apoio á prevención”.
