O grupo político UCIN Boiro, a través do seu coordinador local, Miguel Piqueras, mostrou nun comunicado a súa preocupación trala recente corta de árbores realizada polo Concello na contorna do campo da festa de San Ramón de Bealo e zonas de lecer da parroquia. A formación política reclama “máis transparencia” nestes feitos, xa que recoñecen que non lles abonda coa explicación dada polo Concello acerca das razóns que motivaron a tala: o mal estado sanitario das árbores. UCIN Galicia di que non se achegaron informes técnicos públicos que avalasen a intervención e que esta “provocou un forte impacto paisaxístico e ambiental nun espazo emblemático para a veciñanza”.
A maiores, a formación esixe a repartición social da madeira acumulada prioritariamente entre os veciños da parroquia con pensións baixas ou en situación de vulnerabilidade económica para axudalos cos custos do fogar no inverno, o acceso público aos informes técnicos que xustificaron a tala de raíz en lugar de traballos de poda ou saneamento, a garantía de que o material retirado non sexa comercializado nin derivado a intereses privados, e a execución dun plan de reforestación inmediata con especies autóctonas para recuperar a sombra e a contorna natural do campo da festa.
Ademais, dende UCIN Boiro anuncian a presentación dunha iniciativa no Concello para protocolizar a repartición de madeira procedente de cortas municipais en futuras actuacións, evitando que a leña acabe desaproveitada ou sen control veciñal.
