A undécima edición do festival de títeres reúne en Rianxo, 27 espectáculos de compañías estatais e internacionais con alternativa no Auditorio en caso de choiva.
O festival Titiriberia: Festival de títeres tradicionais, organizado pola asociación Morreu o Demo co apoio do Concello de Rianxo, a Xunta de Galicia, a Deputación da Coruña e o INAEM, encara a recta final da súa undécima edición con 27 funcións no seu cartel. A xornada deste sábado, 22 de agosto, combinará actividades solidarias, teatro de rúa e producións propias, coa previsión de trasladar os pases ao Auditorio de Rianxo se as condicións meteorolóxicas resultasen adversas.
Programación para o sábado
- 12.00 h (Campo de Arriba): Encontro solidario coas persoas participantes na Andaina Solidaria en favor do Pobo Saharaui e as crianzas acollidas polo programa Vacacións en paz, que terán un achegamento directo ao mundo dos monicreques a través de varias compañías do festival.
- 19.00 h (Campo de Arriba): Estrea da peza Retrincos: Sabela e Peito de Lobo, coproducida polo festival e a veterana agrupación Teatro Airiños, quen recrearán relatos de Castelao para dinamizar a Feira Vella.
- 19.30 h (Campo da Bacariza, Isorna): A compañía portuguesa SA Marionetas porá en escena Teatro Dom Roberto, baseado no icónico personaxe tradicional do monicreque de cachaporra luso.
- 20.00 h (Campo de Arriba): Paco Paricio, da compañía aragonesa Titiriteros de Binéfar, conducirá a charla-espectáculo interactiva Los juegos del titiritero.
- 22.00 h (Campo de Arriba): Representación de As varietés do Barriga Verde, espectáculo anual propio do festival que recrea os números da histórica barraca da familia Silvent. A peza estará presentada por Raquel López Cendán e contará coas intervencións de Colectivo Lobishome, Trécola Producións, Larraitz Producións Artísticas, Teatro Airiños e a música ao vivo do cuarteto rianxeiro Riamona.
