O contrato será a xornada completa durante nove meses e está dirixido a mozos e mozas menores de 30 anos en situación de desemprego.
O Concello de Ribeira ven de publicar as bases reguladoras para a contratación laboral temporal dun peón forestal mediante o sistema de concurso-oposición. O posto finánciase a través dunha subvención autonómica orientada a fomentar a inserción laboral da mocidade inscrita no Sistema de Garantía Xuvenil de Galicia en colaboración coas entidades locais.
A praza contará cunha xornada completa de luns a venres —con horarios adaptados ás necesidades do servizo municipal— e terá unha duración de nove meses.
Requisitos para os aspirantes
- Idade: Ter cumpridos os 18 anos e non superar o límite máximo de idade do Sistema Nacional de Garantía Xuvenil (menores de 30 anos).
- Situación laboral: Estar en situación de desemprego e inscrita como persoa demandante no Servizo Público de Emprego de Galicia.
- Rexistro: Figurar como persoa beneficiaria no ficheiro do Sistema Nacional de Garantía Xuvenil no ámbito de Galicia.
O proceso activarase cando o Servizo Público de Emprego remita a listaxe de persoas candidatas ao Concello, momento no que a administración municipal contactará coas persoas seleccionadas para a entrega da documentación requirida. As bases íntegras da convocatoria poden consultarse na sede electrónica municipal de Ribeira.
