Por recomendación dos servizos técnicos municipais o Concello de Muros procedeu estes días ao peche total da pasarela de madeira que une o Artón co peirao en Esteiro, a construción coñecida como a Ponte de Evaristo, tras “detectarse un dano na súa estrutura durante os traballos habituais de mantemento que se realizan de maneira periódica”.
O Concello informou que esta infraestrutura “é obxecto de revisións e labores de conservación de forma continuada e, de feito, antes do inicio da tempada estival levouse a cabo unha nova inspección e as correspondentes actuacións de mantemento”. Foi precisamente no transcurso destas tarefas habituais cando se detectou unha deterioración estrutural que aconsella adoptar esta medida de precaución.
Segundo o informe técnico, “un tránsito peonil ordenado non suporía, en principio, un risco inmediato”. Con todo, dende o Concello sinalan que non “é posíbel garantir que a pasarela non soporte cargas superiores ás previstas ou que se produzan comportamentos inadecuados, como sentarse ou colgarse das varandas, situacións que poderían comprometer a súa seguridade”.
O Concello desculpouse ante residentes e visitantes “polas molestias que poida ocasionar este peche, e máis en tempada estival, pero entendemos que a seguridade debe estar sempre por riba de calquera outra consideración”.
Paralelamente, o Concello xa está a impulsar os trámites necesarios para definir e executar a solución máis axeitada, xa sexa mediante a reparación da infraestrutura ou, se así o determinan os informes técnicos, a súa substitución.
