O BNG de Ribeira celebrou o Día da Galiza Mártir cun roteiro pola memoria histórica que percorreu varios puntos emblemáticos da vila e culminou cunha ofrenda floral no Malecón, xunto á escultura en lembranza das vítimas da ditadura franquista.
A xornada combinou a homenaxe ás figuras represaliadas coa reivindicación dos valores de liberdade, xustiza e dignidade a través de varias paradas:
- Rúa Alexandre Bóveda: Xana Ledo abriu o acto lembrando o 90 aniversario do fusilamento do dirixente galeguista na Caeira (Poio), destacando a súa entrega á causa dunha Galiza con capacidade de decisión política e económica.
- Mural de Castelao: Elsa Santamaría (Galiza Nova) puxo en valor a compenetración estratéxica e cultural entre Castelao («a alma») e Bóveda («o motor») no nacemento do Partido Galeguista e no impulso do Estatuto de 1936.
- Rúa Manuel Lustres Rivas: Marián González repasou a traxectoria do escritor e xornalista ribeirense, detido e asasinado en 1936 tras pasar pola prisión de San Simón, subliñando a necesidade de facer xustiza a través da memoria.
- Monumento ás vítimas no Malecón: Xan Hermida, da Comisión pola Recuperación da Memoria Histórica da Barbanza, incidiu no drama dos desaparecidos e na urxencia das exhumacións pendentes na comarca, ademais de denunciar os dous ataques recentes sufridos pola escultura local sen reproche do goberno municipal.
O acto pechouno o exalcalde e portavoz municipal do BNG, Luís Pérez Barral, quen reivindicou a orixe da efeméride no exilio galego e a responsabilidade de manter vivo o legado democrático. Pérez Barral vinculou eses principios coa actual defensa da lingua, dos servizos públicos e dos dereitos humanos, lembrando ademais o asasinato consecutivo en agosto de 1936 de referentes como Alexandre Bóveda, Federico García Lorca e Ánxel Casal antes de proceder á tradicional ofrenda floral.
