O Concello de Noia afronta unha das fins de semana con maior actividade deste verán, cun amplo calendario de propostas que se desenvolverán desde este venres e ata o domingo en diferentes puntos do municipio.

Comercio local, música en directo, festas populares, actividades para toda a familia e a XVII Concentración Motera Ría de Noia coincidirán durante tres xornadas nas que a actividade se estenderá por diferentes puntos da vila e das parroquias.

A programación comeza este venres coa apertura, ás 12:00 horas na Alameda, do Pop Up impulsado por Noia Histórica, que se desenvolverá durante os días 7, 8 e 9 de agosto. A iniciativa reunirá comercio e actividades complementarias, entre elas un tobogán de auga, unha sesión vermú con DJ, un sorteo dun sancosmeiro e un photocall infantil. Ademais, as persoas que realicen as súas compras durante a fin de semana poderán recibir unha bolsa de tea reutilizable ata fin de existencias.

A música terá tamén un importante protagonismo dentro do programa Rúas Vivas. Este venres, ás 21:00 horas, The Cods actuarán na praza do Tapal, mentres que o domingo, tamén ás 21:00 horas, será a quenda de Embrío no Malecón de Gasset, cunha proposta baseada en versións en galego de temas de Pink Floyd.

A actividade chegará igualmente ás parroquias coa celebración da Festa da Milagrosa de Barro, que contará durante o venres con música tradicional, sesión vermú, inchables, baile e zumba, ademais da actuación de Pili Pampín ás 23:15 horas. O sábado continuará a programación festiva cun campionato de chave.

Tamén se celebrarán durante esta fin de semana as Festas da Peregrina, que o sábado contarán coa actuación de Glasgow 15 ás 23:00 horas. O domingo celebrarase a procesión e mexilloada ás 13:00 horas e unha sesión de vinilo a partir das 20:00 horas.

Concentración Moteira e Noia na Noite

Outro dos grandes focos de actividade será a XVII Concentración Moteira Ría de Noia, que se desenvolverá durante venres, sábado e domingo cun extenso programa de rutas, música, exhibicións e actividades.

Entre as propostas destacan a exhibición gratuíta de stunt do sábado, a actuación de La Gran Batucada, o campionato de EscalaBirras, a ruta nocturna de fachos, os fogos artificiais en lembranza dos moteiros falecidos, o toro mecánico e as diferentes rutas que percorrerán Noia e outros municipios da contorna.

A noite do sábado chegará ademais unha das novidades da programación deste verán: a primeira edición de Noia na Noite, unha proposta que convida a veciñanza e visitantes a descubrir a vila desde outra perspectiva.

Durante a noite desenvolveranse concertos, teatro, visitas teatralizadas e outras actividades culturais, ao tempo que diferentes edificios emblemáticos e espazos de Noia contarán cunha iluminación especial. A proposta completarase coa apertura nocturna de museos e outras iniciativas destinadas a encher de actividade diferentes puntos da vila.

O tenente de alcalde e responsable do programa Rúas Vivas, Manolo Seijas, amosouse “moi satisfeito con como está funcionando a programación deste verán e, sobre todo, coa resposta da xente”. E engadiu: “Estamos vendo unha Noia con actividade practicamente todos os días, con propostas moi diferentes e cunha participación moi boa tanto da veciñanza como das persoas que nos visitan”.

Seijas enmarcou este traballo dentro de Dinamiza Noia, “a campaña coa que nos comprometemos desde o Goberno municipal para dar vida á vila e dinamizar a actividade social e económica de Noia”. E apuntou: “Non se trata só de organizar actividades. Queremos que haxa xente nas rúas, que se merque no noso comercio, que se consuma na nosa hostalaría e que sempre haxa un motivo máis para vir a Noia e quedar en Noia”.

Desde o Concello de Noia convídase á veciñanza e ás persoas que se acheguen á vila durante estes días a participar e desfrutar dunha fin de semana cunha ampla variedade de propostas para diferentes públicos, apoiando ao mesmo tempo o comercio, a hostalaría e a actividade local.