O 12 de agosto vaise poder contemplar dende Galicia un eclipse solar histórico, un fenómeno que non ocorría de forma visíbel na Península Ibérica desde hai máis de un século (desde 1912). A franxa de escuridade total cruzará o país dende o noroeste ata o Mediterráneo ao solpor, facendo de Galicia a primeira comunidade en presenciar a totalidade. Para poder gozar da eclipse con información e, sobre todo, con seguridade, os nosos concellos están a preparar unha manchea de actividades. Por exemplo o de Noia, que converterá o Paseo Marítimo, na dita tarde do 12 de agosto, nun espazo de encontro para “compartir un dos grandes espectáculos astronómicos dos últimos anos”. Previamente (ao mediodía) celebrarase unha charla científica e divulgativa no Coliseo Noela a cargo de José Edelstein (Bos Aires, 1968), físico teórico, investigador e comunicador científico arxentino afincado en Galicia. Exerce como profesor de Física Teórica na Universidade de Santiago de Compostela e desenvolve o seu labor investigador no Instituto Galego de Física de Altas Enerxías (IGFAE).
Para desfrutalo con todas as garantías, o Concello preparou unha xornada para toda a familia:
12:00 h | Charla co astrónomo José Edelstein no Coliseo Noela.
17:30 h | Inchábeis para a cativada nas pistas de tenis do Paseo.
Todo o día | Reparto gratuíto de lentes homologadas.
19:30 – 21:30 h | Visionado do eclipse, acompañado de música de ambiente.
Será en palabras do Concello “unha oportunidade única para aprender, compartir e vivir un momento que tardaremos moitos anos en volver ver”.
