Galicia recuperará este martes 11, Santa Clara e Santa Susana, patroa de Santiago, o tempo estable e o protagonismo do sol grazas á entrada do dominio anticiclónico, acompañado dunha circulación de ventos de compoñente norte e o fluxo de aire cálido procedente do sur da Península Ibérica.
A predición meteorolóxica apunta a unha xornada xeralmente seca e con ceos despexados na maioría do territorio. Con todo, a estabilidade propiciará a aparición de néboas matinais no interior e brétemas costeiras no litoral, que tenderán a disiparse ao longo da mañá para reaparecer de novo cara á noite.
As temperaturas experimentarán un lixeiro a moderado ascenso, ofrecendo un ambiente cálido e agradable nas horas centrais do día (máximas de 30-32 graos). Pola súa banda, o vento soprará do nordés, amosándose frouxo no interior e con intervalos de intensidade moderada no litoral galego.
O noso mar: Vento do norte á mañá e á noite e do noroeste á tarde, forza 1 a 2 á mañá, 2 a 4 á tarde e 2 a 3 á noite. Mar rizado á mañá, marusía á tarde e mar ovellado á noite. Visibilidade regular á mañá e á noite e boa á tarde. Mar de fondo do noroeste, con ondas de 0 a 1 metros á mañá e 0.5 a 1 metros á tarde e á noite.
