A parroquia sonense de Caamaño vai celebrar esta fin de semana as súas Festas Patronais 2026, entre o sábado 15 de agosto e o luns 17. A axenda vén cargada de festa e deporte e tamén de importantes actividades relixiosas. Haberá misas, ruadas, exhibicións deportivas, sesións vermú e unha gran sardiñada o sábado 15 de agosto.
A axenda dará comezo o sábado 15, día adicado á Nosa Señora, que arrincará con dianas e alboradas a cargo do Grupo Canlebó de Camboño. Logo (ás 13h) haberá unha misa solemne na Igrexa Parroquial na honra da patroa seguida de procesión. Ao remate celebrarase unha sesión vermú a carón da igrexa cunha gran sardiñada de balde e animada por Paco de Leña. Polo serán, ás 19.30 horas, haberá unha exhibición de taekwondo no Natural Caamaño na Casa da Cultura.
O domingo 16 de agosto será o día adicado a San Roque, e comezará con dianas e alboradas da man da agrupación Andavía. Ás 13h celebrarase unha misa solemne na Igrexa Parroquial seguida de procesión.
O luns 17 de agosto será o día dedicado á Virxe do Carme. Haberá dianas e alboradas a cargo da Banda de Música de Caamaño e ás 13h celebrarase unha misa solemne na Igrexa Parroquial en recordo de tódolos mariñeiros que deixaron a vida no mar, e cunha especial homenaxe a dona María del Carmen Lema Pouso e ao director da Banda de Música local, Francisco Olveira Santos.
Ao remate celebrarase a tradicional procesión.
Pola noite 21 bombas de palenque porán o remate ás festas patronais.
Organiza a Asociación Cultural Festas de Pedra Furada (Comisión de Festas de Caamaño) en colaboración coa veciñanza da parroquia e o Concello do Porto do Son.
