O ciclo Espazos Sonoros 2026, organizado pola Deputación da Coruña, fará parada no concello da Pobra o vindeiro sábado 26 de setembro cunha xornada que combinará música, patrimonio, historia e literatura e que conta coa colaboración do Concello da Pobra do Caramiñal.
Como antesala da cita musical, ás 17.00 horas desenvolverase A Pobra de Valle-Inclán: un paseo entre historia e literatura, enmarcada nas actividades Coñece o teu patrimonio que acompañan os concertos do ciclo. A información relativa ás inscricións está dispoñíbel na páxina web de Espazos Sonoros.
Logo, ás 20.30 horas, a Igrexa de Santiago da Pobra do Deán acollerá o concerto de Sara Ruiz, de balde e con entrada libre ata completar a capacidade.
Desde a Concellería de Cultura, a edil Patricia Lojo pon en valor a celebración desta iniciativa na vila e destaca o traballo que se vén desenvolvendo desde a área municipal para favorecer unha programación cultural diversa e achegar diferentes propostas á veciñanza. Neste caso, Espazos Sonoros permite tamén vincular a música co coñecemento e a posta en valor do patrimonio, da historia e da literatura local. A concelleira anima tanto á poboación da Pobra como ás persoas visitantes a participar na xornada.
Entre o 5 de setembro e o 8 de outubro, Espazos Sonoros 2026 percorrerá diferentes enclaves. Ademais da Pobra do Caramiñal, o programa inclúe citas en Arteixo, Betanzos, Vilasantar, Malpica de Bergantiños e Oza-Cesuras, antes de pechar a edición en Viena.
