Os axentes da nova unidade UICON interceptaron os infractores de noite mediante o uso de drons e visores térmicos nunha zona de acceso restrinxido. Os axentes da UICON detectaron a infracción durante un operativo de vixilancia antifurtivismo, coa presenza de 4 furtivos nunha zona restrinxida deste espazo natural.
Axentes ambientais da Unidade de Investigación de Conservación da Natureza (UICON), pertencente á Consellería de Medio Ambiente e Cambio Climático, incautaron 154,7 quilogramos de berberecho extraídos de xeito ilegal no Complexo Dunar de Corrubedo e lagoas de Carregal e Vixán.
A intervención produciuse no marco dun dispositivo antifurtivismo despregado nunha zona de acceso restrinxido do parque natural. Durante o operativo —no que se empregaron medios tecnolóxicos como drons, visores nocturnos e prismáticos— os axentes localizaron a catro persoas mentres mariscaban sen autorización e detectaron os puntos onde ocultaban as capturas. Ao comprobarse que o marisco se atopaba en bo estado, foi reintegrado de inmediato ao seu hábitat.
Denuncias por infracción da Lei de Patrimonio Natural
Os catro implicados foron identificados e denunciados por vulnerar a Lei 5/2019 do patrimonio natural e da biodiversidade de Galicia, normativa que tipifica como infracción a extracción non autorizada de recursos en espazos protexidos.
A operación forma parte do plan de actuación da UICON, unha brigada móbil autonómica integrada por oito axentes especializados que a Xunta puxo en funcionamento este ano para combater delitos ambientais complexos que demandan vixilancia técnica avanzada e cobertura en todo o territorio galego.
