A parroquia ribeirense acollerá tres xornadas de celebracións do 21 ao 23 de agosto, incluíndo unha gran sardiñada popular e a saída da imaxe relixiosa en catamarán.
A parroquia de Castiñeiras prepárase para vivir tres días de festexos patronais entre o venres 21 e o domingo 23 de agosto. O programa foi presentado polo concelleiro de Festexos, Fernando Abraldes; o concelleiro de Deportes, Álex Vidal; e as representantes da comisión organizadora, Manolita Vidal e Beatriz Rodríguez.
Entre os fitos principais da edición deste ano figuran a colocación da estrela no paseo da fama en honra da nadadora olímpica María Vilas, a tradicional sardiñada no porto e a procesión marítima a bordo dun catamarán na honra da Virxe do Carme.
Programa de actos
- Venres, 21 de agosto:
- 10:00 h: Bombas de palenque anunciando o inicio dos festexos.
- 20:00 h: Misa na honra do Sagrado Corazón de Xesús.
- 22:30 h: Verbena e sesión musical con MG, DJ Iván Mata e DJ Maverick.
- Sábado, 22 de agosto:
- 10:00 h: Bombas de palenque.
- 12:00 h: Alboradas polas rúas co grupo de gaitas Salgueiriños.
- 13:00 h: Homenaxe e colocación da estrela de María Vilas Vilas no paseo da fama.
- 13:30 h: Gran sardiñada popular no porto, amenizada por Salgueiriños.
- 17:00 – 20:00 h: Festa infantil con inchables e festa da escuma.
- 18:00 h: Partido de fútbol solteiros contra casados nas pistas de Punta do Castro.
- 20:00 h: Misa en honra a San Cristovo con bendición de vehículos no adro da igrexa.
- 22:30 h: Noite de festa con Planet Discomóvil, Mateo Abelleira e o grupo EVA-10.
- Domingo, 23 de agosto:
- 10:00 h: Bombas de palenque e pasarrúas con Salgueiriños.
- 11:00 h: Misa solemne na honra da Virxe do Carme, cantada polo Coro Parroquial Bon Pastor e coa intervención de Salgueiriños.
- 12:30 h: Procesión terrestre e posterior embarque en catamarán para a procesión marítima e a ofrenda floral polos mariñeiros falecidos.
Para embarcar no catamarán, a organización repartirá os pases de acceso ás portas da igrexa parroquial a partir das 10:30 horas (media hora antes do inicio da misa), ata completar a capacidade máxima da embarcación.
