- Rubén Gontad, veciño de Bexo, coroouse campión tras ser o primeiro en capturar a bandeira vermella sobre o mastro con sebo.
- A cita, documentada desde 1919, alcanzou os 60 participantes cun aumento notable de mocidade e mulleres.
Centos de persoas déronse cita este domingo na Ponte (Padrón) para presenciar un dos espectáculos máis emblemáticos e tradicionais do verán galego: as cucañas sobre o río Ulla. O evento, con rexistros históricos que se remontan a 1919, volveu poñer a proba o equilibrio e a destreza dos concursantes nunha tarde marcada pola emoción, as risas e as inevitables caídas á auga.
Nesta edición, Rubén Gontad, veciño da parroquia de Bexo, proclamouse campión ao facerse co cobizado pano vermello no extremo do mastro engraxado. O segundo posto foi para Fidel Buceta («Fidel da Ponte»), veciño do lugar e presidente da Comisión de Festas, mentres que o terceiro caixón do podio o ocupou Roberto Rial, tamén da Ponte.
A xornada destacou polo auxe na participación, alcanzando un total de 60 persoas. Desde a organización subliñaron o crecente relevo xeracional, cunha presenza cada vez maior de xente nova e mulleres que se atreven a afrontar a esvaradía vara de madeira.
O rexedor padronés, Anxo Arca, xunto á concelleira de Festas, Chus Campos, e o edil de Deportes, Luis Mariño, seguiron a competición desde as bancadas municipais habilitadas para a ocasión. Desde o Concello trasladaron a súa felicitación aos gañadores, participantes e á Comisión de Festas polo labor de salvagardar unha das tradicións máis senlleiras da identidade local.
