Unha compañía aérea de nova creación, Fly2Galicia, anunciou que comezará a operar a partir do 1 de decembro coa apertura dunha base en Santiago de Compostela, desde onde voará a ata oito destinos diferentes cun total de 17 frecuencias semanais.
Entre as oito cidades, cinco son destinos internacionais: Bruxelas, Praga, Múnic, Venecia e Milán. Estas súmanse a outras tres conexións nacionais (Zaragoza, Alacant e Granada), que a operadora deu a coñecer publicamente este domingo a través das súas redes sociais.
Segundo detallou, o voo inaugural, que sairá o mesmo 1 de decembro, será o de Santiago-Zaragoza. Para ese mesmo día están programados outros dous voos internacionais, que de momento non concretou. O resto de conexións comezarán a funcionar esa mesma semana.
O vindeiro martes, 18 de agosto, habilitará a web para reservas. Entón, o público poderá consultar ao detalle as frecuencias, horarios e prezos. Con todo, anticipou que as viaxes ás tres cidades españolas custarán desde 19 euros; as pasaxes a Milán e Bruxelas venderanse a partir de 39 euros, e os voos a Múnic, Praga e Venecia sairán desde 49 euros.
A aeroliña asegurou que mesmo a tarifa máis reducida incluirá dúas pezas de equipaxe de man; en concreto, unha maleta de cabina de oito quilos e un artigo privado.
