Efectivos do GEDEX desprazáronse ao lugar de Quintas para asegurar e trasladar a munición militar de 37 mm para a súa posterior neutralización.
A Garda Civil procedeu á retirada dun proxectil de artillaría da época da Guerra Civil localizado nunha propiedade particular situada no lugar de Quintas, dentro do termo municipal de Padrón.
O operativo activouse tras recibir un aviso no Centro Operativo de Servizos (COS), no que se alertaba da presenza dun obxecto de aparente natureza militar nunha vivenda da zona. Ata o punto desprazáronse especialistas do Grupo de Desactivación de Explosivos (GEDEX), quen confirmaron sobre o terreo que se trataba dun proxectil de artillaría de calibre 37 mm con vaíña de latón, correspondente a munición anticarro histórica.
Os técnicos especializados procederon a asegurar e retirar o artefacto da leira coas debidas garantías de seguridade, trasladándoo a un emprazamento habilitado para a súa posterior neutralización controlada.
