Somos moitos os que cada vez estamos máis convencidos de que o problema da vivenda se utiliza como cuestión política e electoral pero non hai unha vontade real en buscarlle unha solución a miles de familias que teñen moito problemas para atopar unha vivenda alcanzable. Mentres tanto son demasiados os propietarios que se aproveitan para incrementar de maneira desorbitada e abusiva as rendas ao alugueiro de vivenda habitual ou ben utilizan a posibilidade de alugueiros de tempada ou pisos turísticos.
As Comunidades Autónomas posúen as competencias en materia de vivenda pero tamén os Concellos teñen a obriga de velar polos intereses de todos os seus veciños, moitos deles que se teñen que marchar para outras localidades porque nos seus termos municipais non hai quen poida arrendar unha vivenda alcanzable e de longa duración. Non é que non existan vivendas, senón que a maioría están baleiras ou ben á espera dos turistas e visitantes, principalmente en período estival, para percibir elevados ingresos, por un curto período de tempo.
Hai que lembrar que as Administracións Públicas están obrigadas, legalmente, a garantir unha alternativa habitacional ás familias vulnerables, para iso teñen que dispoñer dun parque de vivendas públicas adquiridas directamente, por compra ou construción, ou ben a través da negociación para a cesión temporal por parte dalgúns grupos inmobiliarios ou fondos de investimento e poder destinalas a alugueiros sociais.
A vivenda hai que entendela como un Dereito e non como un privilexio ou negocio. Para iso hai que adoptar medidas radicais ás que non están dispostos os gobernantes da dereita política que prefiren manter o mesmo status e que se continúen enriquecendo algúns propietarios á conta do froito do traballo honrado de miles de familias humildes.
