STAC, empresa galega dedicada ao deseño e fabricación de compoñentes e solucións para xanelas, portas e fachadas, continúa avanzando na súa estratexia de crecemento cun novo plan de investimento superior aos 20 millóns de euros nas súas instalacións de Padrón. Segundo informou a dirección da empresa, “esta actuación súmase ao investimento de máis de 25 millóns de euros realizada en 2022 no seu complexo industrial de Catoira, fortalecendo o seu desenvolvemento industrial en Galicia”. O novo plan permitirá “reforzar a capacidade produtiva, optimizar procesos clave e preparar á compañía para afrontar os próximos retos de expansión internacional”, sinalan.
O plan inclúe actuacións estratéxicas destinadas a consolidar a estrutura produtiva da compañía e mellorar a eficiencia operativa en todas as súas áreas.
Entre as principais iniciativas destaca a posta en marcha dun almacén automatizado de produto terminado para expedicións, que está a permitir incrementar a capacidade de almacenaxe e reducir de forma significativa os tempos de preparación e envío.
Así mesmo, a compañía está a ampliar as súas capacidades industriais duplicando a capacidade en procesos de lacado e zincado. Estas melloras compleméntanse coa ampliación das instalacións existentes e a construción de novas naves que seguirán reforzando a estrutura industrial do grupo.
Para os próximos exercicios, a compañía prevé novas actuacións que consolidarán a súa evolución industrial.
Neste contexto, no que a innovación, a eficiencia e a mellora continua son pancas estratéxicas clave, STAC atópase xa en fase de montaxe dun segundo almacén intelixente, neste caso para compoñentes, que multiplicará por catro a dispoñibilidade de materiais para montaxe e outros procesos produtivos, mellorando a axilidade operativa e a eficiencia interna.
Ademais, a compañía está a levar a cabo dúas actuacións estratéxicas: a ampliación da súa capacidade de montaxe mediante a construción de novas naves industriais e o desenvolvemento de novas áreas de carpintería e bancos de ensaio. Ambas as iniciativas, previstas entre finais de 2026 e comezos de 2027, reforzarán a calidade dos procesos e o deseño de produto.
Este proceso de transformación industrial acompáñase dunha evolución progresiva dos equipos humanos, en liña co desenvolvemento da compañía. Só no último ano, STAC aumentou o seu persoal máis dun 15%.
