Portos de Galicia e o Concello de Noia impulsarán unha actuación que permita recuperar a conexión peonil da pasarela do paseo marítimo da localidade. Como primeira medida, e por razóns de seguridade, ambas administracións colaborarán no peche temporal da infraestrutura, tras o informes técnicos realizados. Así o acordaron a presidenta do ente público, Natalia Botana, e o alcalde noiés Francisco Pérez, nunha reunión na sede do organismo autonómico.
No encontro, abordaron o estado desta infraestrutura pola que transitan diariamente veciños e visitantes da vila noiesa, e que, segundo lembraron, “pon en risco a seguridade dos peóns”. Ante esta situación ambas Administracións encargaron informes técnicos para precisar a gravidade, concluíndo a necesidade do peche ata que poida executarse a actuación correspondente. Deste xeito, o Concello procederá a un primeiro balizamento hoxe mesmo que será reforzado nos vindeiros días por Portos de Galicia.
Ademais da medida urxente de peche, Natalia Botana e o rexedor local acordaron iniciar a tramitación dun convenio de colaboración que permita desenvolver, nos próximos meses e con financiación de ambas administracións, a actuación necesaria para recuperar este ámbito do paseo marítimo e restablecer a conexión peonil nas mellores condicións de seguridade. Xunta e Concello tramitarán coa maior celeridade posible este convenio para poder executar canto antes as obras que permitan reabrir a pasarela ao tránsito peonil.
