O Xurado dos premios Ramiro Carregal acaba de abrir a convocatoria para o XV Premio Internacional de Investigación Oncolóxica Científica e Técnica e para o VIII Premio a Talentos Emerxentes. Na reunión celebrada a pasada semana en Santiago de Compostela, o Xurado que preside o empresario e mecenas Ramiro Carregal acordou pechar o prazo de presentación de solicitudes o próximo 29 de xaneiro de 2027.
“Trátase dunha convocatoria moi especial, posto que é a décimo quinta edición destes Premios tan queridos para min”, sinalou o empresario e mecenas Ramiro Carregal, fundador da empresa ribeirá FRINSA.
O presidente executivo do xurado, o doutor Rafael López, destaca tamén este feito posto que “poucos certames destas características, nados do compromiso persoal dun empresario, chegan a cumprir os 15 anos de vida, o cal é unha dobre satisfacción, tanto polo exemplo que supoñen na nosa contorna como pola axuda e visibilización que supoñen para a investigación médica”.
Xunto cos dous presidentes, forman parte do Xurado desta décimo quinta edición a reitora da Universidade de Santiago de Compostela, Rosa Crujeiras; o decano da Facultade de Medicina e Odontoloxía da USC, José Carreira; os exdecanos Julián Álvarez e Juan Gestal; o catedrático en Farmacoloxía da Facultade de Medicina Manuel Freire-Garabal e o Dr. Javier de Castro Carpeño, presidente da Sociedade Española de Oncoloxía Médica (SEOM).
O veterano dos Premios de Investigación Ramiro Carregal chega á súa edición número 15 cunha relevante lista de galardoados entre a que se atopan nomes como Mariano Barbacid, José Baselga, Marisol Soengas, Carlos López-Otín, Eduardo Díaz-Rubio, Ana Lluch, Guido Kroemer, Luís Paz-Ares, Amparo Cano, Manuela Gago ou Emilio Alba, entre outros. Máis de 150 candidaturas de todo o mundo avalan un certame que trata de colaborar coa investigación oncolóxica básica e clínica e pór de relevo o importante papel que ten o mundo empresarial, e a sociedade en xeral, en ámbitos que supoñen avances substanciais para a humanidade. Unha vez máis o galardón principal está dotado con 30.000 euros.
Pola súa banda, o Premio destinado a Talentos Emerxentes, que este mesmo ano aumentou a súa dotación até os 15.000 euros, chega á súa oitava edición cunha lista de investigadores cuxa brillante traxectoria, a pesar da súa mocidade, supón unha esperanza para a investigación oncolóxica. Arkaitz Carracedo, José Tubío, Noelia Tarazona, César Serrano e Patricia Altea son algúns dos premiados nesta categoría destinada a menores de 45 anos.
Ambos os premios terán aberto o prazo de presentación de candidaturas para a súa nova edición até o venres 29 de xaneiro de 2027 ás 23:59 h. As propostas deberán conter un breve resumo do proxecto e as razóns que motivan a súa relevancia, ademais dos datos do candidato proposto referentes ao seu currículo, méritos e publicacións realizadas.
As solicitudes poderán enviarse por correo postal ou electrónico, ou subirse a través da propia web do certame. Na mesma páxina web pódese consultar as bases completas de ambos os Premios así como toda a información relativa aos mesmos. Durante o mes de febreiro de 2027 darase a coñecer o fallo do Xurado e nas semanas seguintes entregaranse os galardóns, como é habitual, nun acto solemne que terá lugar na capital galega.
