Un gobernante é un servidor público e como tal se merece o respecto necesario, con independencia do partido ao que pertenza ou teña a ideoloxía que teña. O que non pode ser é que o alcalde de Vilanova de Arousa, Gonzalo Durán, con máis de tres décadas no cargo como máximo responsable municipal continúe sufrindo atentados contra os seus bens particulares ou familiares, sufra insultos ou acoso pola súa xestión pública. Ninguén pode xustificar este tipo de situacións que en nada benefician a unha convivencia harmónica entre os veciños da devandita localidade arousá.
Todos somos coñecedores da violencia exercida, durante décadas, por parte de xente próxima ao contrabando e ao narcotráfico que converteron nunha auténtica polvoreira a zona sur da ría de Arousa. Anos de loita, por parte das nais coraxe, a sociedade civil, as forzas de seguridade do estado así como da Fundación Galega contra o Narcotráfico puideron minorar as consecuencias de tanta violencia e criminalidade.
Vilanova de Arousa foi e é un pobo con xente traballadora que vive maioritariamente do mar e as súas riquezas naturais, desexando continuar así baixo o prisma do respecto e a convivencia. A violencia nunca pode estar xustificada, moito menos cara a un cargo público que nos representa e traballa para a maioría de cidadáns.
