O vindeiro mércores, 29 de xullo, o Teatro Coliseo Noela (Noia) acollerá a gala de entrega do Premio Portus Apostoli 2025, que servirá tamén para abrir a 13ª edición do Noia Harp Fest.
A cita contará coa participación da Real Filharmonía de Galicia, baixo a dirección de César Ramos, e co arpista José Antonio Domené como solista.
Durante o concerto levarase a cabo a estrea mundial de Alén do azul, obra do compositor coruñés Teo Montero Rey, gañador da cuarta edición do Premio Internacional de Composición Portus Apostoli. Trátase dunha peza profundamente inspirada no océano e que evoca a fraxilidade do ser humano ante a inmensidade do mar. É unha obra composta especificamente para arpa e orquestra, deseñada para expandir o repertorio contemporáneo deste instrumento. O autor, TEo Motero, é un compositor coruñés de tan só 20 anos de idade. Estudou no CMUS de Culleredo e continuou o seu Grao en Composición no Conservatorio Superior de Música “Eduardo Martínez Torner” do Principado de Asturias. O galardón Portus Apostoli outorgoulle un premio económico de 4.000 euros. Non é o seu único éxito recente, xa que tamén gañou o I Premio Intercentros Melómano de Composición en 2024 coa súa obra para soprano e piano Domine, ne in furore tuo arguas me.
Será en palabras do Concello “unha gran noite para desfrutar da música en Noia e dar comezo a unha nova edición dun festival xa consolidado no calendario cultural da vila”.
A gala será o mércores, 29 de xullo a partir das 20:30 h. As entradas xa están en Ataquilla.com.
