O delegado do Goberno en Galicia, Pedro Blanco, visitou este luns 20 de xullo as instalacións de Cortizo en Coirós, salientando este proxecto “como exemplo do modelo industrial polo que aposta o Goberno de España para Galicia”.
Blanco coñeceu de primeira man o novo Centro de Reciclaxe de aluminio da compañía no dito concello coruñés en compañía do presidente da Corporación Cortizo, José Manuel Cortizo; do director da planta, Francisco Lestón; do subdelegado do Goberno na Coruña, Julio Abalde, e dos alcaldes de Padrón e Rianxo, Anxo Rei e Julián Bustelo.
Pedro Blanco salientou como o Goberno está a apoiar proxectos das empresas galegas que son tractoras para a economía, como os de Cortizo, que recibiu 14,7 millóns de euros do Goberno para desenvolver actuacións de modernización, innovación e sustentabilidade que reforzan a cadea de valor da industria metalúrxica.
Boa parte destes investimentos están vinculados ao Plan de Recuperación. Recentemente, o Ministerio de Industria e Turismo concedeu á compañía case 8 millóns de euros para novos proxectos industriais. Ademais, o Ministerio para a Transición Ecolóxica e o Reto Demográfico apoiou con máis de 4,5 millóns de euros, a través do PERTE de Economía Circular, un proxecto de fabricación sostible de perfís de PVC con materiais reciclados mediante tecnoloxías avanzadas.
“O apoio a empresas como Cortizo non só fortalece a súa capacidade para competir, senón que acelera a transformación do tecido produtivo galego cara a un modelo máis innovador, sostible e con maior valor engadido. Esa é a folla de ruta do presidente do Goberno de España: acompañar ás empresas que invisten, innovan e crean emprego de calidade”, sinalou.
O delegado tamén destacou a aposta de Cortizo por Coirós coa posta en marcha do novo Centro de Reciclaxe de aluminio, que cualificou como “un magnífico exemplo de economía circular”. “Esta planta demostra que é posible crecer sendo cada vez máis respectuosos co medio ambiente, situando a sustentabilidade e a innovación no centro da actividade industrial”, engadiu.
Estas instalacións supuxeron un investimento de 38 M€ e contan cunha superficie de 29.000 m². Desde a súa posta en marcha, Cortizo trasladou a este centro todo o proceso de reciclaxe de aluminio que estaba a realizar en Padrón. A planta de Coirós pode producir ao ano 100.000 toneladas de tocho de aluminio reciclado posconsumo, é dicir, materia prima para a extrusión.
