O Concello do Porto do Son rematou as obras de mellora da senda peonil da Arnela, un treito da ruta entre o núcleo urbano e o Castro de Baroña, un dos principais elementos patrimoniais do municipio.
O punto onde se actuou contaba cunha beirarrúa moi estreita, en partes con apenas 70 centímetros de ancho. Ademais, estaba delimitada pola beiravía (o arcén) da calzada e, polo exterior, por un pequeno parapeto de bloques de granito apoiado sobre o muro de contención da mesma, unha configuración que incrementaba a perigosidade para as persoas usuarias.
Co obxectivo de arranxar esta problemática, executouse a construción dunha plataforma pola parte exterior da beirarrúa, mantendo a mesma rasante e garantindo a protección dos peóns mediante o devandito parapeto de granito. Esta nova estrutura, cun ancho aproximado dun metro e 70 centímetros, esténdese ao longo de todo o tramo e adáptase ao perfil do muro de contención, proporcionando un tránsito cómodo, seguro e accesíbel.
Esta actuación “responde ao compromiso de mellorar os espazos públicos, garantir a accesibilidade universal e promover unha mobilidade peonil segura e respectuosa coa contorna”, sinalou o Concello do Son.
O investimento formalizouse a través dun convenio de colaboración da ARD Ría de Muros-Noia, cuxo importe ascendeu a 249.896,51 euros.
