O Concello de Padrón acordou ampliar ata o vindeiro 25 de setembro de 2026 o prazo de presentación de obras ao XII Certame Poético Rosalía de Castro, co obxectivo de facilitar a participación dun maior número de autoras e autores nesta convocatoria dedicada á creación poética en lingua galega.
A ampliación do prazo permitirá que as persoas interesadas dispoñan de máis tempo para preparar e presentar os seus traballos a un certame consolidado como unha das citas de referencia da poesía galega contemporánea, impulsado polo Concello de Padrón como homenaxe permanente á figura e ao legado literario de Rosalía de Castro.
O concurso está aberto a persoas de calquera nacionalidade que presenten obras inéditas en lingua galega, non premiadas previamente noutros certames. O premio, único e indivisible, está dotado con 1.500 euros, diploma acreditativo e a publicación da obra gañadora na colección de Poesía Rosalía de Castro do Concello de Padrón.
As composicións presentadas deberán ter temática libre e unha extensión mínima de 400 versos. A documentación deberá remitirse por correo postal ao Concello de Padrón seguindo o sistema de plica establecido nas bases da convocatoria.
Desde o Concello anímase a poetas e creadoras e creadores literarios a aproveitar esta ampliación do prazo para participar nun certame que contribúe á promoción da literatura galega e que mantén vivo o vínculo de Padrón coa obra e coa memoria de Rosalía de Castro.
As bases completas e toda a información relativa á convocatoria poden consultarse a través da páxina web municipal e nas canles habituais de información do Concello.
