Este sábado 25 de xullo tivo lugar na antiga Fábrica de Sel, en Muros, a presentación do libro Campos de Memoria de Francisco Javier Lestón, que estivo acompañado por Juan Caamaño Cebreiro, Socorro Leis París e Caridad González Cerviño, concelleira de Cultura de Muros, que foi a encargada de moderar o acto e que agradeceu ao escritor “que elixise o noso concello para presentar o seu último libro”, que é a sexta obra publicada polo muradán Francisco Lestón.
A cita, ateigada de público, foi un encontro literario especial para o autor, de fondo significado, por celebrarse precisamente en Muros, “onde comezou todo”. Segundo relatou Francisco nos días previos, “en 2013 regresei a Muros para presentar a miña primeira novela, La eternidad en 231 días, e aquel día comezou unha aventura literaria que nunca imaxinei que me levaría a publicar seis libros e a percorrer un camiño cheo de historias, emocións e aprendizaxes”.
Catorce anos despois Francisco volve ao mesmo lugar para presentar unha novela que precisamente fala da memoria, das raíces, dos vínculos familiares e da importancia de non esquecer aquilo que nos construíu.
Sinopse e temática
A obra xorde do medo ao silencio e ao esquecemento que supón a morte das persoas maiores. A través da voz de unha avoa nada en 1922, o relato reconstrúe a vida e a capacidade de resistencia de toda unha xeración.
Trátase dunha homenaxe á transmisión familiar, á dignidade silenciosa e á necesidade colectiva de lembrar as nosas raíces.
A novela está dispoñíbel para a súa compra en plataformas en liña como Amazon ou a FNAC, así como baixo pedido en librarías físicas a través de distribuidoras como AGAPEA.
O argumento de Campos de memoria afonda nunha crónica íntima e colectiva estruturada arredor dos eixes xeográficos e históricos da Asturias mineira e a Galicia rural. A historia comeza coa imaxe evocadora da avoa sendo nena, chegando montada nun burro cunha maleta pequena.
