Máis de 130 nadadores déronse cita nesta edición, na que un grupo de 13 persoas con dano cerebral adquirido logrou completar con éxito a proba.
A solidariedade e o deporte uníronse este mediodía en Vilaxoán coa celebración da 3ª edición da Travesía a Nado Polo Dano Cerebral, unha cita que pechou as súas portas cun balance inmellorable e batendo un récord histórico de participación ao superar os 130 nadadores e nadadoras.
Máis aló das cifras, o gran fito da xornada levouno o grupo de 13 persoas con dano cerebral adquirido que participaban na travesía. Todos eles foron quen de culminar a proba con éxito, demostrando a eficacia e o impacto positivo do programa de natación adaptada que Dano Cerebral Galicia promove desde finais de 2025.
Este evento deportivo e de visibilización foi posible grazas á estreita colaboración entre a asociación Arousaman-Arousawoman, o Concello de Vilagarcía de Arousa e a Fundación de Deportes municipal.
Amplo respaldo institucional
A entrega de premios e o acto central da xornada contaron cunha destacada representación das administracións públicas, que quixeron amosar o seu apoio a esta causa. Entre as autoridades presentes estiveron:
- Luciano Fernández, presidente de Dano Cerebral Galicia.
- Alberto Varela, alcalde de Vilagarcía de Arousa.
- Carlos Coira, presidente da Fundación de Deportes de Vilagarcía.
- Javier Tourís, deputado de Acción Comunitaria da Deputación de Pontevedra.
- Begoña Abeijón, directora xeral de Discapacidade da Xunta de Galicia.
A organización celebrou o éxito organizativo dunha proba que xa se consolidou no calendario deportivo da comarca de Arousa como un referente de inclusión, superación e solidariedade.
