O Concello de Noia compartiu estes días nas redes sociais o programa completo XXVII Feira Medieval da Vila de Noia, cuxo pregoeiro xa percorreu a vila estes días anunciando algunhas das actividades.
Serán, en palabras do Concello, “tres días de música, campamentos, xustas, artesáns, obradoiros, espectáculos e moitas historias da vila por descubrir”.
A XXVII edición da feira desenvólvese entre este venres 17 e o domingo 19 de xullo.
O programa inclúe novas recreacións históricas, espectáculos, obradoiros, animación e moitas sorpresas para converter o centro histórico noiés nun auténtico escenario medieval.
Unha das grandes novidades deste ano é que o Concello de Noia asume de novo a organización directa da feira, co obxectivo de “reforzar as recreacións históricas e os espectáculos de rúa”.
No programa destacan actividades como a recreación da chegada ao porto noiés no ano 1147 das naves británicas do monxe Arnulfo, que facían escala camiño de Santiago. Terá lugar no peirao do Marqués.
Amais, o paseo marítimo recuperará os tradicionais torneos medievais a cabalo, con novos contidos e personaxes.
Cóntase con máis de 200 postos en rúas e prazas: postos de artesanía, alimentación e demostracións de oficios tradicionais.
Haberá obradoiros en directo, xogos para os máis pequenos e espectáculos de animación teatral itinerante baseados en lendas locais.
