A igrexa de San Domingos de Bonaval acollerá o vindeiro luns, 13 de xullo, ás 20:00 horas, un concerto de Amancio Prada dedicado a Rosalía de Castro. O evento está promovido pola Fundación do Panteón de Galegas e Galegos Ilustres —institución integrada polo Parlamento de Galicia, a Xunta de Galicia, o Concello de Santiago e o Arcebispado compostelán—.
A entrada será gratuíta, pero será necesario retirar un convite previamente (cun máximo de dous por persoa). A reserva de entradas abrirase en liña este mércores, 8 de xullo, ás 12:00 horas, e estará dispoñible ata completar o aforo.
Un “ramo de cancións” a carón do sepulcro
O cantautor amosou unha “extraordinaria” emoción por poder actuar por fin neste espazo, un desexo que mantiña desde a súa mocidade. A cita coincide, ademais, co quincuaxésimo aniversario do seu emblemático álbum Rosalía de Castro (1975).
“Levo cantando a Rosalía desde que era un mozo, os seus versos xa formaron parte do meu primeiro disco Vida e morte (1974). E agora, no quincuaxésimo aniversario do álbum Rosalía de Castro (1975), non vou dar un concerto en Bonaval, vou depositar un ramo de cancións sobre a tumba de quen as inspirou. Rosalía segue iluminando a poesía de Galicia e de todos nós. Desde a primeira vez que entrei nese lugar, soñei con poder cantarlle alí”.
Máis de cincuenta anos de diálogo musical
A traxectoria de Amancio Prada está ligada de xeito indisoluble á obra da poeta do Sar. O recital proporá un percorrido musical e vital por ese camiño que xa forma parte da memoria colectiva de Galicia: desde as súas primeiras composicións, caracterizadas por unha pureza espida, ata as novas relecturas actuais, froito da experiencia e a madurez.
Máis alá de conmemorar o aniversario do disco, o artista define esta velada musical como unha “cerimonia de gratitude” e unha oportunidade única para comprobar como a música e a poesía seguen tecendo pontes de emoción e memoria compartida.
