O Concello de Boiro colabora coa XXX edición da Regata Cruceiro Cenor, que terá lugar os días 11 e 12 de xullo entre os náuticos de Barraña e Portonovo. O alcalde, José Ramón Romero, participou na presentación da proba xunto con Javier Ruiz de Cortázar, presidente do náutico de Portonovo, e Jesus Babío, presidente do Náutico de Barraña.
A regata está dividida en tres categorías: para barcos ORC, solitario, veteranos e J80. “Este ano cambiamos a data pero a regata segue a manter o mesmo percorrido con saída de Portonovo e chegada ao náutico de Barraña”, confirmou Javier Ruiz de Cortázar
Está prevista a participación dunhas 25 embarcacións e máis de 70 persoas que chegarán o sábado a Boiro e participarán neste Trofeo Concello de Boiro. “Pola nosa parte é un orgullo que se siga a contar co náutico de Barraña para a celebración desta regata”, recoñeceu Jesús Babío.
Este ano, con motivo do trinta aniversario da regata, a entrega de premios do Trofeo Concello de Boiro terá lugar no Pazo de Goiáns. O alcalde, José Ramón Romero, agradeceu os dous náuticos a súa implicación “para que unha proba coma esta se manteña viva tanto tempo, poñendo a Boiro no mapa do turismo náutico”.
