A praia dos Areos acollerá este sábado, 18 de xullo, a I Regata Remo de Mar Mecalsa, unha cita organizada polo Club Remo da Pobra e a Federación Galega de Remo que reunirá deportistas das categorías alevín, infantil e cadete nas modalidades C1X e C2X.
A xornada dará comezo ás 10.00 horas, mentres que a reunión de delegados está prevista para as 09.00 horas na carpa da organización. Ao longo da mañá disputaranse as diferentes probas, con distancias adaptadas a cada categoría.
O percorrido desenvolverase na contorna da praia dos Areos. As saídas realizaranse desde o areal, en formato beach sprint, e a chegada estará situada no mar, sinalizada mediante unha boia.
A organización establece unha participación libre por clubs, sempre que exista dispoñibilidade de embarcacións para a competición. Ademais, as inscricións tramítanse a través da plataforma da Federación Galega de Remo e os clubs participantes deberán contar coa correspondente licenza federativa en vigor.
O Concello da Pobra do Caramiñal colabora nesta cita deportiva, que conta tamén co apoio de diferentes entidades e empresas patrocinadoras, e anima á veciñanza e ás persoas visitantes a achegarse á praia dos Areos para seguir de preto o desenvolvemento da competición e apoiar ás e aos participantes.
